رکھے جو مدینے کو قلم پیشِ نظر اور

رکھے جو مدینے کو قلم پیشِ نظر اور

نکلیں گے سرِ بحرِ ثناء لعل و گُہر اور

---

تسکینِ فدایانِ رخِ یار کی خاطر

اے گلشنِ فردوس تسلی سے سنور اور

---

دے کانپتے ہونٹوں سے وہ زہراء کا وسیلہ

خیراتِ کرم چاہئیے منگتے کو اگر اور

---

بے فائدہ تکرار بشر کو نہیں زیبا

تجسیمِ بشر اور ہے تصویرِ بشر اور

---

خوشبو کی معیّت میں کبھی تو کوئی قاصد

لائے گا مدینے سے کسی روز خبر اور

---

اُگتے ہیں فقط ماہِ مدینہ کی عطا سے

ہر بار مِرے نخلِ تخیّل پہ ثمر اور

---

تشبیہہْ جو دیتا ہے تِرے رخ کو قمر سے

وہ سوچے ابھی واقعہِ شقِّ قمر اور

---

لا ریب کہ آئیں گے تبسم شہِ والا

چمکاؤ قنادیلِ درودی سے یہ گھر اور