طیبہ جو یاد آیا ‘ آنسو ٹپک گئے ہیں

طیبہ جو یاد آیا ‘ آنسو ٹپک گئے ہیں

یہ آبگینے خود ہی اکثر چھلک گئے ہیں

---

جس جس روش سے گزری سرکار کی سواری

گلشن تو پھر ہیں گلشن ‘ صحرا مہک گئے ہیں

---

جس سمت اٹھ گئی ہیں رحمت مزاج نظریں

ماحول کے جبیں سے سجدے ٹپک گئے ہیں

---

روضے پہ چشم تر نے عاصی کی شرم رکھ لی

پلکوں سے کچھ فسانے خود ہی ڈھلک گئے ہیں

---

غربت میں ان کا دامن جب یاد آگیا ہے

فکرو نظر کی حد تک جادے چمک گئے ہیں

---

فریاد اب تو سن لیں سرکار عاصیوں کی

آہیں بھی تھک گئی ہیں ‘ آنسو بھی تھک گئے ہیں

---

اے زائرِ مدینہ رستہ نہ بھول جانا

ان منزلوں میں اکثر تقوے بہک گئے ہیں

---

اقبؔال صدق دل سے یہ نعت کس نے چھیڑی

بے نُور انجمن میں جلوے لپک گئے ہیں