تُسیں لجپال تے میں ہاں بے لجی یا رسول اللہ
تُساڈے نال ہے دُنیا ایہہ سجی یا رسول اللہ
تصور آپ دا میرے خیالاں وچ سدا رہندا
ایہہ منیاں ہاں میں کوہجی تے کُچجی یا رسول اللہ
ناں دِل نوں چین آیا اے ناں اکھاں رون توں رُکیاں
کٹاری ہجر دی جد توں اے وجی یارسول اللہ
غبار اُڈ دا اے پر نہیں آپ دی ناقہ نظر آئی
میں انھے واہ ہاں ہر پاسے نوں بھجی یارسول اللہ
میری ہر معصیت ہر اک خطا ہر دور دے اندر
تری رحمت دی چادر نے ہے کجی یا رسول اللہ
نئیں اوہنوں حشر تیکر بُھکھ زمانے دی ستا سکدی
جو روضہ ویکھ کے تیرا اے رجی یارسول اللہ
جو ہو جاندی نظر منظور ہے تیرے غلاماں دے
ہے صائم اوہ سُہاگن تے سُچجی یارسول اللہ
شاعر کا نام :- علامہ صائم چشتی
کتاب کا نام :- کلیات صائم چشتی