اترے ملک زمینِ حرم پر تیرے حضور
انوار کا نزول ہے یکسر ترے حضور
حاضر ہے تیرا بندہ کمتر ترے حضور
پلکوں کی اوٹ میں لیے گو ہر ترے حضور
فکرِ حکیم سربگریبان و منفعل
عقلِ سلیم عاری و ششدر ترے حضور
ختمِ رسُل کا رتبہ ازل سے تجھے ملا!
ہیں با ادب تمام پیمبر ترے حضور
اعجاز یہ بھی ہے ترے خُلقِ عظیم کا
پل بھر میں موم ہوگئے پتّھر ترے حضور
اشجار نے بھی تیری صداقت بیان کی
بولے زبانِ حال سے کنکر ترے حضور
تائبؔ کو آرزو کوئی اس کے سوا نہیں
محشر کے دن ہو تیرا ثنا گر ترے حضور
شاعر کا نام :- حفیظ تائب
کتاب کا نام :- کلیاتِ حفیظ تائب