یا رب درِ رسول پہ جانا نصیب ہو
روضے پہ ان کے نعت سنانا نصیب ہو
گھر بار تیری رہ میں لٹانا نصیب ہو
نامِ نبی پہ جان گنوانا نصیب ہو
مدفن بنے ”بقیعِ معلیٰ“ ہے آرزو
طیبہ کی ٹھنڈی چھاؤں میں سونا نصیب ہو
احرامِ عشق باندھ کے طیبہ کا ہو سفر
اشکوں کے موتی در پہ لٹانا نصیب ہو
مال و منال کی مجھے ہرگز نہیں طلب
نعلینِ پاک سر پہ اٹھانا نصیب ہو
احمد کی آرزو ہے یہی ربِّ کائنات
عشقِ نبی میں دل کو جلانا نَصیب ہو
شاعر کا نام :- مولانا طفیل احمد مصباحی
کتاب کا نام :- حَرفِ مِدحَت