یادوں میں وہ شہرِ مدینہ منظر منظر آج بھی ہے
ایک زمانہ گذرا لیکن ، رُوح معطّر آج بھی ہے
کوئی نظر خضریٰ سے اُٹھ کر اس کے چہرے پر نہ گئی
یہ احساسِ ندامت یارو چاند کے رُخ پر آج بھی ہے
مدحِ نبی کی نغمہ سرائی حمد و ثنا کی گُل پاشی
کل بھی یہی تھا اپنا مقدر ، اپنا مقدر آج بھی ہے
وہ دیدار کا موسم ، ساقی پیشِ نظر اور جام ِ دید
برسوں بیت گئے اس رُت کو ہاتھ میں ساغر آج بھی ہے
بے سایہ تھی ذاتِ محمد اور اب ان کا ہی سایہ
انسانوں پر سایہ افگن رحمت بن کر آج بھی ہے
عہدِ ادیبؔ اور مدحِ محمد کوئی آج کی بات نہیں
چودہ صدیوں سے یہ چرچا یونہی گھر گھر آج بھی ہے
شاعر کا نام :- حضرت ادیب رائے پوری
کتاب کا نام :- خوشبوئے ادیب