چلی پیا کے دیس دولہنیا بھیس بدل کے
عشق محمد کا غازہ چہرے پہ مل کے
قرآں اور حدیث کا ٹیکا جھومر پہنا
خدمتِ دیں کی خوشبو ہر بُنِ مو سے چھلکے
حنا شریعت اور طریقت کی لگوائی
چھُٹنے کے ڈر سے چلتی ہے ہلکے ہلکے
جھل مل کرتی اوڑھنی اوڑھی حنفیت کی
قادری چشتی چوڑیاں پہنیں بدل بدل کے
نتھنی رضوی مسلک کی زیبائش اس کی
سرمہ بریلی کا آنکھوں سے جھلکے جھلکے
امجدی ہار گلے میں ڈالا ہیروں والا
اور برکاتی نسبت سر سے پا تک ڈھلکے
نظمی نے کی چہرہ نمائی اٹھا کے گھونگھٹ
دشمن کے دل کالے پڑ گئے حسد میں جل کے
شاعر کا نام :- سید آل رسول حسنین میاں برکاتی نظمی
کتاب کا نام :- بعد از خدا