اہلِ نظر کی آنکھ کا تارا عَلیؑ علی
اہلِ وفا کے دِل کا سہارا علیؑ علی
رحمت نے لے لیا مجھے آغوش نُور میں
مَیں نے کبھی جو روکے پکارا علیؑ علی
اک کیف اک سرور سا رہتا ہے رات دن
جب سے ہُوا ہے درد ہمارا علیؑ علی
کعبے کے بُت گرائے نہیں اپنے ہاتھ سے
حضرت نے مُسکرا کے پُکارا علیؑ علی
دُنیا میں سب سے عالی گھرانے کے نُور ہو
اِس واسطے ہے نام تمھارا علیؑ علی
اعظؔم یہ مغفرت کی سَنَد ہے ہمارے پاس
ہم ہیں علی ؑ کے اور ہمَارا علیؑ علی
شاعر کا نام :- محمد اعظم چشتی
کتاب کا نام :- کلیاتِ اعظم چشتی