وہ لوگ جو جاتے ہیں مکّے میں مدینے میں

وہ لوگ جو جاتے ہیں مکّے میں مدینے میں

تقدیر بناتے ہیں مکّے میں مدینے میں

---

اب تک ہیں فضاؤں میں خوشبوئیں پسینے کی

آثار بتاتے ہیں مکّے میں مدینے میں

---

منظر وہ احد کے ہوں یا غارِ حرا کے ہوں

اک یاد دلاتے ہیں مکّے میں مدینے میں

---

کعبے کی فضا تجھ سے روضے کی ضیا تجھ سے

ہم دل چمکاتے ہیں مکّے میں مدینے میں

---

کعبے کی چمک میں بھی روضے کی مہک میں بھی

ہم تجھ کو ہی پاتے ہیں مکّے میں مدینے میں

---

عشّاق ترے آقا بس تیری محبت میں

آتے کبھی جاتے ہیں مکّے میں مدینے میں

---

اک تیرے تصور میں پھرتے ہیں جو گلیوں میں

ہم پیاس بجھاتے ہیں مکّے میں مدینے میں

---

توحید کا نغمہ ہو یا بات درودوں کی

ہم تجھ کو سناتے ہیں مکّے میں مدینے میں

---

رحمت کی امیدیں ہوں، بخشش کی نویدیں ہوں

سب تجھ ہی سے پاتے ہیں مکّے میں مدینے میں

---

مکّہ بھی ترا اعلیٰ طیبہ بھی ترا افضل

ہم سر کو جھکاتے ہیں مکّے میں مدینے میں

---

اک تیرا سہارا ہو بخشش کا اشارا ہو

اس آس پہ آتے ہیں مکّے میں مدینے میں

---

اے کاش ہو نوری بھی ان سعد نصیبوں میں

ہر سال جو آتے ہیں مکّے میں مدینے میں