اللہ سوہنا کھیت کھیت ہریالی ونڈے
کلیاں، پھُل تے میوے ڈالی ڈالی ونڈے
اللہ سوہنا وادی وادی رنگ کھلاے
بیلے بیلے نگر نگر خوشحالی ونڈے
اللہ سوہنا راتاں وچوں دن پنگراوے
شام سویرے لہندے چڑھدے لالی ونڈے
امبر اتے تاریاں والے دیوے بالے
راہواں دے وچ چھاواں پالو پالی ونڈے
اوہدی کیہڑی کہڑی نعمت گنیے تائب
خبرے کیہ کجھ جگ وچ جگ دا والی ونڈے
شاعر کا نام :- حفیظ تائب
کتاب کا نام :- کلیاتِ حفیظ تائب