اے شہ انس و جاں جمالِ جمیل
تجھ پہ تخلیقِ حُسن کی تکمیل
رہبرِ انبیا و ختم رُسل
ذاکر و تذکرہء ربِّ جلیل
دمِ عیسیٰ ؑ کہ ہو یدِ بیضٰی
والضُحیٰ کی نہ مثل ہے نہ مثیل
نُورِ مطلق کا رازدار و امیں
افتخارِ جہاں ہے فخرِ خلیلؑ
سایہء نورِ مصطفےٰؐ ناپید
نُور لایا ہے نُور ہی کی دلیل
بانئ دینِ حق نبئ کریم ؐ
دینِ فطرت سلامتی کا کفیل
ہے حلیمہؑ کی بکریوں والا
بزمِ ہستی میں نُور کا قندیل
گودڑی پوش رازِ اِلا اللہ
تجھ پہ شیدا خُدا تُو ایسا شکیل
آپ کی بات آیتِ قرآں
آپ ہی کے لئے قولِ ثقیل
آپ ہی کی زباں ہے حق گویا
آپ ہر ہے کلام کی تنزیل
نالہء نِیم شب کا شر چشمہ
یا نبیؐ جاگئے گا اِلّا قلیل
تُو شفیق اور رحمتِ عالم!
مُحسنِ اِنس و جاں حسین و جمیل
عقل و دانِش غلام ہیں تیرے
فہم و اِدراک سے ورا ہے عقیل
مدعا ، منتٰہی ، مرادِ حیات
جادہء شوق میں امام سبیل !
آستانِ نبیؐ ہے فخرِ زمیں
آسماں سرنگوں پئے تقبیل
چشم مازاغ ‘ رُخ کلام اللہ
اور والَّلیل ہی ہے زلفِ طویل
ہے صنم گر بھی محوِ رنگِ صنم
یا صنم یا صمد ہے بالتمثیل
مظہر کِبریا ہے ذاتِ نبی ؐ
بزم ِ اِمکان ہے اخیر و قبیل
خواجہء دو جہاں کی کیا ہو ثناء !
خودثناء خوا ہوا ہے ربّ جلیل
کیا بیان ہو سکے گی شانِ نبی ؐ
بعد حق کے توئی شکیل و جزیل
اِک نگاہِ کرم نبئ کریم ؐ
مجھ پہ کیجے بحقِ اسمٰعیل ؑ
آپ کے در پر سر رہے ہر دم
معصیّت معرفت میں ہو تبدیل
یا محمّد ؐ سدا ہو وِردِ زبان
پائے ساقی پہ ہو میری تکمیل
رازِ شاہِ اُمم ہیں شاہِ نجفؑ
قِصّہ کو تاہ ہے بات بالتفّصیل
جب توجہ میں آگیا واصِفؔ
تو جنوں سے خرد کی ہے تشکیل
شاعر کا نام :- واصف علی واصف
کتاب کا نام :- ذِکرِ حبیب