انبیاء کی کہکشاں ہے مصطفیٰؐ صرف ایک ہے

انبیاء کی کہکشاں ہے مصطفیٰؐ صرف ایک ہے

غار ہیں لاکھوں مگر غارِ حرا صرف ایک ہے

---

سینکڑوں اوصاف کے مالک ہیں یوں تو اور بھی

دو جہاں کی لاج ممدوحِ خدا صرف ایک ہے

---

میں تصور میں بھی چھو سکتا نہیں اُسؐ کا وجود

میری سوچوں کی حدوں سے ماورا صرف ایک ہے

---

جانے کتنے لوگ رستے میں بکھر کر رہ گئے

عرش پر جس کا قدم جا کر رُکا صرف ایک ہے

---

ساری دنیا جس کو انجؔم ڈھونڈتی پھرتی ہے آج

سارے پھولوں سے حسیں وہ نقشِ پا صرف ایک ہے