اُویسیوں میں بیٹھ جا بلالیوں میں بیٹھ جا

اُویسیوں میں بیٹھ جا بلالیوں میں بیٹھ جا

طلب ہے کچھ تو بے طلب سوالیوں میں بیٹھ جا

---

یہ معرفت کے راستے ہیں اہل دل کے واسطے

جُنیدیوں سے جا کے مل ‘ غزالیوں میں بیٹھ جا

---

صحابیوں سے پھول ‘ تابعین سے چراغ لے

حضورؐ چاہئیں تو ان موالیوں میں بیٹھ جا

---

درود پڑھ نماز پڑھ ‘ عبادتوں کے راز پڑھ

صفیں تو سب بچھی ہیں عشق والیوں میں بیٹھ جا

---

ہر ایک سانس پر جو اُن کو دیکھنے کا شوق ہے

تُو آنکھ بن کر اُن کے در کی جالیوں میں بیٹھ جا

---

اگر ہیں خلوتیں عزیز تو ہجوم میں نکل

اگر سکون چاہیے دھمالیوں میں بیٹھ جا

---

جو چاہتا ہے گلستانِ مصطفےٰؐ کی نوکری

تو بو ئے مصطفےٰؐ پہن کے مالیوں میں بیٹھ جا

---

مظفر آپ تک رسائی اتنی سہل تو نہیں

توجہ چاہیئے تو یرغمالیوں میں بیٹھ جا