اے صبا لے کے تو آ ان کے بدن کی خوشبو

اے صبا لے کے تو آ ان کے بدن کی خوشبو

میں بھی سونگھوں ذرا جنت کے چمن کی خوشبو

---

یوں تو قرآن ہے اللہ تعالیٰ کا کلام

اس سے آتی ہے کسی مشک دہن کی خوشبو

---

جس پہ اک بار رکھا آقا نے دستِ شفقت

مرتے دم تک نہ گئی مشکِ ختن کی خوشبو

---

میرے آقا کا کرم ابر سا برسا ہے جہاں

طوبیٰ سے بڑھ کے ہے طیبہ کے چمن کی خوشبو

---

نوشہء بزمِ جہاں سیر کو آیا ہے یہاں

آج جنت نے لگائی ہے دولہن کی خوشبو

---

مدح قرآن میں ہے زلف و رخِ احمد کی

پوچھو صدیق سے مخمور نَیَن کی خوشبو

---

جس چٹائی نے تنِ پاک پہ چھوڑے ہیں نشاں

اس چٹائی کو ملی مشکِ ختن کی خوشبو

---

اوڑھ لی جس نے رِدا حبِّ حبیبِ رب کی

حشر تک پھیکی نہ ہو اس کے کفن کی خوشبو

---

نکہتِ فاطمہ زہرا سے معطر ہے جہاں

دور تک پھیلی حسین اور حسن کی خوشبو

---

خاکِ طیبہ مرے سینے سے لگائے رکھنا

قبر میں آئے مجھے شاہِ زمن کی خوشبو

---

یوں تو ہے ہند وطن میرا کئی پشتوں سے

طیبہ سے آتی ہے روحانی وطن کی خوشبو

---

قادری چشتی مہک بڑھ گئی مارہرہ میں

یوں تو پہلے سے ہی تھی گنگ و جمن کی خوشبو

---

ہجر میں آپ کے اچھا نہیں لگتا کچھ بھی

یا نبی اب تو سنگھا دیجیے ملن کی خوشبو

---

آپ سے دور رہوں یہ مجھے منظور نہیں

میرے سرکار سنگھا دیجیے ملن کی خوشبو

---

انتظار کرم تست من نظمی را

یا نبی اب تو سنگھا دیجیے ملن کی خوشبو

---

نظمی صاحب نے چنی ہے بڑی سنگلاخ زمیں

پھر بھی ہر شعر میں ہے نعت کے فن کی خوشبو