اے شہِ کون و مکاں ماحئی غم شاہِ اُممؐ

اے شہِ کون و مکاں ماحئی غم شاہِ اُممؐ

ہو مرے حال پہ اک نظرِ کرم ،شاہِ اُممؐ

---

تیرےؐ شایاں میرے خامہ میں کوئی لفظ نہیں

تیریؐ توصیف کروں کیسے رقم ، شاہِ اُممؐ

---

حشر میں سایہء رحمت کی ضرورت ہے ہمیں

تیریؐ قربت کے طلبگار ہیں ہم ، شاہِ اُممؐ

---

دل تڑپتا ہے ترےؐ در کی حضوری کے لئے

میری پلکیں ہیں تریؐ یاد میں نم ، شاہِ اُممؐ

---

آپؐ اگر دیکھ لیں اک بار توجہ سے ہمیں

دُور ہو جائیں سبھی رنج و الم ، شاہِ اُممؐ

---

پردہ داری مری دُنیا میں ہوئی ہے جیسے

حشر میں بھی مرا رہ جائے بھرم ، شاہِ اُممؐ

---

آپؐ چاہیں تو بدل جائے مقدر میرا

آپؐ سے دُور کہاں لوح و قلم ، شاہِ اُممؐ

---

تمؐ سے بڑھ کر کوئی محبوب نہیں ہے مجھ کو

عنبریں زُلف کے ہر خم کی قسم ، شاہِ اُممؐ

---

بامِ قوسین پہ جھنڈا ہے تریؐ عظمت کا

کہکشائیں ہیں ترے زیرِ قدم ، شاہِ اُممؐ

---

اب تو مل جائے حضوری کی اجازت مجھ کو

اب تو اشفاقؔ پہ ہو جائے کرم ، شاہِ اُممؐ