بے مہر ساعتوں کو ثمر بار کر دیا
یادِ نبیؐ نے بخت کو بیدار کر دیا
کب زندگی کو پھول سا لہجہ ہُوا نصیب
اِس دشت کو تو آپؐ نے گلزار کردیا
ذکرِ نبیؐ سے روح میں اتری ہے چاندنی
دل کے حرا کو مرکزِ انوار کر دیا
جینے کا کیا قرینہ سکھایا حضورؐ نے
قرآن ہی کو زینتِ کردار کردیا
ہر بے نوا کو جرأتِ اظہار بخش دی
ہر بے خبر کو واقفِ اسرار کر دیا
اللہ کے سوا کوئی معبود ہی نہیں
حسنِ عمل سے اس کا بھی اظہار کر دیا
اب حاضری کو اذنِ سفر دیجئے حضورؐ!
جینا مِرا فراق نے دشوار کردیا
فیضیؔ مِرے حضورؐ کا ہے یہ بھی معجزہ
ہر دور کے شعور کو بیدار کر دیا
شاعر کا نام :- اسلم فیضی
کتاب کا نام :- سحابِ رحمت