تم کعبہِء دل تم قبلہء جاں سرکارِ دو عالم شاہِ زماں
تم جانِ نظر تم روحِ رواں سرکارِ دو عالم شاہِ زماں
یہ چاند یہ سورج یہ تارے یہ کوہ و بیاباں یہ ذرّے
روشن ہیں تمھیں سے کون و مکاں سرکارِ دو عالم شاہِ زماں
تم پنہاں ہو تم ظاہر ہو تم شافعِ یومِ آخر ہو
تم فخر رُسل تم فخر جہاں سرکار دو عالم شاہِ زماں
کیا دشت و چمن کیا فرشِ زمیں کیا ہفتِ فلک کیا عرشِ بریں
تم ہی ہو یہاں تم ہی ہو وہاں سرکارِ دو عالم شاہِ زماں
ہوتے ہیں یہ دو عالم رقصاں پڑھتی ہے درود اُس وقت زباں
آتا ہے تمہارا نام جہاں سرکارِ دو عالم شاہِ زماں
تم عقدہ کُشائے ہر دو سرا تم مرکزِ فکرِ دستِ گدا
ہر شے پہ تمہارا ہے احساں سرکارِ دو عالم شاہِ زماں
اس کو ہے مدینہ کا ارماں رہتا ہے سدا مضطر گریاں
بہزاؔد حزیں ہے نوحہ کناں سرکارِ دو عالم شاہِ زماں
شاعر کا نام :- بہزاد لکھنوی
کتاب کا نام :- نعت حضور