محمدؐ کے دم سے ہے شانِ رسالت
محمد ہیں خود آسمانِ رسالتؐ
فضائے زمانہ پہ چھایا ہوا ہے
بہار آشنا گلستانِ رسالتؐ
رسولوں میں ان کو ملی سر بلندی
محمد ہیں بس آسمانِ رسالتؐ
رسالت ترے نام پر خود ہے نازاں
میں قرباں ترے قدردانِ رسالتؐ
نبی تو بہت سے زمانے میں آئے
بڑھی ہے تجھی سے یہ شانِ رسالتؐ
ہے قرآن شاہد وحی خود ہے شاہد
لسانِ خدا ہے لِسانِ رسالتؐ
بُلا لیجئے بہزادؔ کو بھی مدینے
کہ بہزادؔ ہے مدح خوانِ رسالتؐ
شاعر کا نام :- بہزاد لکھنوی
کتاب کا نام :- نعت حضور