جاتا ہے زمانہ طرفِ کوئے مُحمَّد
ہیں دونوں جہاں والہِ گیسوئے مُحمَّد
اِس لمحہء پُرکیف پہ صدقے یہ زمانہ
جب لائے صبا نکہتِ گیسوئے مُحمَّد
پُر نُور نہیں مہر و مہ و ذرّہ و انجم
ہے دہر میں تا بندگئ روئے مُحمَّد
دُنیا کی نگاہوں سے ہمیں واسطہ کیا ہے
اپنی تو نگاہیں ہیں فقط سوئے مُحمَّد
اے میرے خُدا اے مرے خالق مرے اللہ
ہم کو بھی دکھا دے رُخِ نیکوئے مُحمَّد
ہاں سونگھ کے دیکھو تو ہر اک غنچہ و گُل کو
ہر غنچہ و گُل دیتا ہے خوشبوئے مُحمَّد
اک لفظ بھی کہتا نہیں میں اپنی زباں سے
بہزادؔ نظر ہے طرفِ کوئے مُحمَّد
شاعر کا نام :- بہزاد لکھنوی
کتاب کا نام :- نعت حضور