زیبِ فرشِ جہاں رسُولِ خُدا
زینتِ آسماں رسُولِ خُدا
بخشوائیں گے ایک دن سب کو
حامئ عاصیاں رسُولِ خُدا
بانئ لفظ کُن ہے ذات اُن کی
وجہِ کون و مکاں رسُولِ خُدا
واقف رازِ ابتدا بھی ہیں
ختم پیغمبراں رسُولِ خُدا
خالقِ دو جہاں بھی ہے راضی
ہیں اگر مہرباں رسُولِ خُدا
نور مہر و مہ کواکب کیا
سب میں جلوہ کناں رسُولِ خُدا
دیکھنا ہے یہ ہم کو اے بہزؔاد
کب بلائیں وہاں رسُولِ خُدا
شاعر کا نام :- بہزاد لکھنوی
کتاب کا نام :- نعت حضور