پائی گئی ہے دوش پہ جن کے ، رِدائے خیر

پائی گئی ہے دوش پہ جن کے ، رِدائے خیر

خُلقِ عظیم وقف ہے اُن کا برائے خیر

---

اُن کے نَفَس نَفَس کے ہے جُنبش ، ہَوائے خیر

اُن کے عمل سے ہوگئی محکم، بِنائے خیر

---

خیرالبشرؐ کے دَم سے مقّدر بدل گئے

جو خیر کے خلاف تھے، وہ ہیں گدائے خیر

---

ہے مصطفیٰؐ کا نُور ، سُکوں ریز و دیں پناہ

ہاں، کفرِ شر پسند، اب اپنی منائے خیر

---

ہم اُس نبیؐ کے خیر سے ادنیٰ غلام ہیں

جو ابتدائے خیر ہے، جو انتہائے خیر

---

رحمت کے بادلوں کو جِلو میں لیے ہُوئے

چھانے لگی مدینے سے چل کر ہوائے خیر

---

ہر دم دُرود بھیج! رسولِؐ انام پر

اُن کی گلی میں جا! کہ مقدر میں آئے خیر

---

خیر البشرؐ نے شر کو مٹایا کچھ اِس طرح

ہر گوشۂ زمیں پر رہے جم کے پائے خیر

---

رحمت ہے خاص و عام پہ اُس بارگاہ میں

پائیں گے ہر قدم پہ سب اپنے پرائے ، خیر

---

ہر سُو جو حادثوں کے شرارے نظر پڑے

سب کہہ رہے ہیں اب کہ مدینہ ہے جائے خیر

---

محشر میں سب تھے اُن کی شفاعت کے منتظر

وہ آگئے حضورؐ، وہ اُبھرا لِوائے خیر

---

آفاق میں نہ کس لیے گونجے مِری صدا

مَیں بھی تو ہُوں نصیرؔ! شریکِ دُعائے خیر