رودادِ انبساط کا عنواں ہے تیری یاد
سب کیلئے نشاط کا ساماں ہے تیری یاد
ہر دَور میں پیامِ مسرت ہے تیرا ذکر
ہر فصل میں بہار بداماں ہے تیری یاد
افکارِ دو جہاں کا مداوا ہے تیرا نام
آلامِ روزگار کا درماں ہے تیری یاد
روشن ہے جِس کی ضُو سے جہانِ دل و نظر
وہ شمع تابناک و فروزاں ہے تیری یاد
جاہ و جلال اِن کی نگاہوں میں کیا جچے
مال و منالِ خاک نشیناں ہے تیری یاد
شاعر کا نام :- حفیظ تائب
کتاب کا نام :- کلیاتِ حفیظ تائب