چن عرب دا چلیا عرشاں نوں راہواں وچ وچھ گئے تارے نیں
گوراں نے گیسو سونے دے قدماں دے ہیٹھ کھلارے نیں
خالق نے بخشش کرنی اے محبوب دی جھولی بھرنی اے
سب عاصیاں اوگنہاراں دے اج جانے بخت سنوارے نیں
لولاک لما دا خالق نے سوہنے نوں تاج عطا کیتا
وانجم دی بھر کے مانگ جدوں گیسو والیل سنوارے نیں
آدم توں لے کے عیسیٰ تک ہتھ بنھ کے اندر اقصی دے
راہ ویہندے عربی ڈھولن دا مرسل پیغمبر سارے نیں
انج مدل پیندا اے جاون دا سجناں نوں کول بلاون دا
چن تارے سارے خالق نے محبوب دے اُتوں وارے نیں
توں واعظ ایویں اوہناں دی امداد دا منکر ہوندا ایں
ایہہ دونویں ای عالم سوہنے دے صدقے رب آپ اُتارے نیں
میرا کملی والا اے صائم گیا لنگھ اوہناں سرحداں توں
ہوراں دی گل کی جس تھاں تے جبریل جہئے وی ہارے نیں
شاعر کا نام :- علامہ صائم چشتی
کتاب کا نام :- کلیات صائم چشتی