دمبدم تیری ثنا ہے یہ بھی

دمبدم تیری ثنا ہے یہ بھی

دل دھڑکنے کی صدا ہے یہ بھی

---

چاند، اسرٰی کی سرِ راہ دلیل

تیرا نقشِ کفِ پا ہے یہ بھی

---

نگہِ لُطف سے دشمن، ہوئے دوست

شانِ رحمت کی ادا ہے یہ بھی

---

اچّھے اُس کے ہیں، بُرے میرے ہیں

کملی والے نے کہا ہے یہ بھی

---

شافعِؐ حشر وہ ہیں، مَیں عاصی

وہ بھی برحق ہے، بجا ہے یہ بھی

---

رات دن گُنبدِ خضریٰ دیکھوں

رات دن ایک دُعا ہے یہ بھی

---

نعت کو حاصلِ ایماں سمجھا

ذکرِ محبوبِؐ خدا ہے یہ بھی

---

کعبہ جاں ہے درِ ختمِ رُسُل

سَر جھُکا لوں تو روا ہے یہ بھی

---

کون رو کے دلِ مضطر کو نصیرؔ

اب تو ہاتھوں سے چلا ہے یہ بھی