گھر میرے وی چانن لاجا
مدینے دیا چن سوہنیا
جان لباں اُتے آن کے کھلو گئی
تے آکھاں تیرا راہ ویہندیاں
مِل جان دے فجر دیاں بانگاں
توں زُلفاں نوں چک مُکھ توں
تیرے ہندیاں وی دُکھ نہیں جے مُکنے
تے ایہدے نالوں موت گھلدے
میں کی کرنی خُدائی ساری منگ کے
مینوں تے میرا یار چاہی دا
تیری یاد وچ جگ سارا روندا
اے غاراں وچ رون والیا
میرے ورگے کروڑاں ہین تینوں
تیرے جیہا مینوں کوئی نہیں
میرے سُتے ہوئے لیکھ جگا جا
مدینے دیا چن سوہنیا
اوہ نئیں پُچھدے طور دیاں راہواں
جنہاں نے تیرا شہر ویکھیا
مک چلیا اے صائم تیرا
تے مُکی نہیں اُڈیک سجناں
جے نہیں ملنا قبر توں پہلاں
تے میں کی لیناں زندگی توں
کدی سُفنے چہ دید کرا جا
اے عرشاں تے جان والیا
اکھاں نال میں چُماں اوہ نگاہواں
جنہاں نے تیرا روضہ ویکھیا
کدی سُن کے صائم دے ہاڑے
اے غاراں وچ رون والیا
شاعر کا نام :- علامہ صائم چشتی
کتاب کا نام :- کلیات صائم چشتی