سب دے غم خوار نبی رتبے نرالے تیرے
دو جہاناں چہ پئے ہون اجالے تیرے
دل مرا جان مری دین تے ایمان مرا
میری ہر چیز مرے آقا حوالے تیرے
بن گئے حیدرؓ و فاروقؓ تے صدیقؓ و غنیؓ
جنہاں مے خواراں نے پیتے نے پیالے تیرے
بجھ گئے آپ تیرا نور بجھاون والے
دیوے بلدے ای سدا رہن گے بالے تیرے
غیر ولّے نہ نگاہ اٹھی کدے اوہناں دی
جنہاں خوش بختاں نوں رب جلوے وکھالے تیرے
خادمِ حضرتِ حسانؓ ظہوریؔ سارے
تیرے ٹکڑے تے پئے پلدے نیں پالے تیرے
شاعر کا نام :- محمد علی ظہوری
کتاب کا نام :- کِتھے تیری ثناء