گھپ اندھیرا تھا یہاں بزمِ حِرا سے پہلے

گھپ اندھیرا تھا یہاں بزمِ حِرا سے پہلے

حُبس کتنا تھا رسالت کی گھٹا سے پہلے

---

کس طرح کھُلتا بھلا بابِ اجابت اُن پر

بھول جاتے تھے دُعا لوگ دُعا سے پہلے

---

جانتا کوئی نہ تھا جیسے وفا کے معنی

ساری دنیا میں مرے جانِ وفا سے پہلے

---

سارے چہروں کا وہی حال ہوا کرتا تھا

حال پھولوں کا جو ہوتا ہے صبا سے پہلے

---

ایڑیاں کتنے رگڑتے تھے کہ بچ جائیں مگر

مر ہی جاتے تھے کوئی لوگ دوا سے پہلے

---

جانے کتنے ہیں وہ نادان جو اُن کے گھر سے

لوٹ آتے ہیں یہاں اُن کی عطا سے پہلے

---

تم نے سوچا ہے کبھی خلقِ خدا میں لوگو !

کون تھا جلوہ نما ارض و سما سے پہلے

---

کتنی بے جوڑ صدائیں تھیں جہاں میں انجؔم

شور ہی شور تھا رحمت کی صدا سے پہلے