حق نما حق صفات آپ کی ذات
شاہکار حیات آپ کی ذات
خالق کائنات ذات خدا
مقصد کائنات آپ کی ذات
شرح تہذیب ایک ایک عمل
روحِ اخلاقیات آپ کی ذات
شرق و غرب آپ کے نشانِ قدم
جہت شش جہات آپ کی ذات
جزوِ ایماں مطالعہ جس کا
دیں کی وہ کلیات آپ کی ذات
حیرت انگیز آپ کا معمول
مظہر معجزات آپ کی ذات
ہر صدی آپ کے جلو میں چلے
ہر زمانے کے ساتھ آپ کی ذات
جس کی تائید تا ابد ہوگی
وہ ثبوت ثبات آپ کی ذات
میرا منشور میرا پیمانہ
آپ کی بات آپ کی ذات
کیا مظفر ہو عاقبت کی فکر
میری وجہ نجات آپ کی ذات
شاعر کا نام :- مظفر وارثی
کتاب کا نام :- نورِ ازل