ہر رفعتِ دُنیا مری سرکارؐ پہ واری
ہر تاج ہے کونین کے سردار پہ واری
دُنیا کی فصاحت ترے ہر لفظ پہ ـحیراں
ہر فکر تری خوبیِ گفتار پہ واری
ہر حُسن کی دستار ہے نعلین پہ قُرباں
انوارِ دو عالم ترے رُخسار پہ واری
ہر زخم کا مرہم ہے یہی اسمِ مبارک
میری سبھی خوشیاں مرے غمخوار پہ واری
سب حور و ملائک بھی سبھی جن و بشر بھی
ہیں خالقِ کونین کے شہکار پہ واری
یہ شمس و قمر یہ شجر و حجر و کواکب
سب ندرتیں بھی عظمتِ دربار پہ واری
سب انبیاء بھی حشر میں نازاں ہیں تمہی پر
سب اُمتیں بھی اپنے طرفدار پہ واری
جبریلؑ نے سدرہ پہ کہا سرورِ دیں سے
میں آپؐ کی پرواز کی رفتار پہ واری
تہذیب و تمدن کے یہ منشور و عنایات
اے محسنِ انساں ترے افکار پہ واری
عشاق کے انداز نرالے ہیں کہ یہ لوگ
دیدار تو کیا حسرتِ دیدار پہ واری
بوبکرؓ ہیں بوبکرؓ مصلے پہ مرے بعد
مومن ہیں حضورؐ آپکے اِصرار پہ واری
مجھ احقرِ اعظم کو عطا نعت ہوئی ہے
ہو کیوں نہ شکیلؔ احمدِ ﷺ مختار پہ واری
شاعر کا نام :- محمد شکیل نقشبندی
کتاب کا نام :- نُور لمحات