جب مدینے کی طرف کوئی نکل پڑتا ہے

جب مدینے کی طرف کوئی نکل پڑتا ہے

اُس کے پیچھے دلِ بے تاب بھی چل پڑتا ہے

---

کوئی نا مانے مگر قبلہ صفَت ہے روضہ

دل اُسے تکتے ہی سجدے کو اچھل پڑتا ہے

---

اے مِرے لفظِ دعا! یاد کرا دوں تجھ کو

سبز رنگت کا بھی رستے میں محل پڑتا ہے

---

پڑھتا رہتا ہوں درود اُن پہ بصد شوق و ادب

ورنہ سانسوں کی روانی میں خلل پڑتا ہے

---

کیا مقدّر ہے کہ ذکرِ درِ جانانہ پر

چشمہِ اشک نگاہوں سے اُبل پڑتا ہے

---

ہم علی والے جو لیتے ہیں ابوبکر کا نام

اِس سے کیوں گردنِ بد بخت میں بَل پڑتا ہے

---

عرش والے بھی کریں اُس کے مقدّر کو سلام

قُرْعہ جس شخص کا طیبہ کا نکل پڑتا ہے

---

مدحتِ شاہِ عرب میں ہے تبسم وہ نشہ

اب مِرا دل نہ فسانہ نہ غزل پڑھتا ہے