جے چمکے میری قسمت دا ستارا
کراں میں تیرے روضے دا نظارا
میں کیوں سجدے کراں غیراں دے دَر تے
مینوں کافی تِرے در دا سہارا
سُنے جاندے نہیں لوکاں دے طعنے
کرو حضرت مرے درداں دا چارا
جے اِک واری کرم دی جھَات پاویں
مِری کشتی نوں مِل جاوے کنارا
خطاواں میریاں نوں کون ویکھے
جے ہووے تیری رحمت دا اشارا
مِری تربت اتے پاویں جے پھیرا
میں کیوں زندہ نہ ہو جاواں دو بارا
مَیں اعظؔم کیوں نہ اوسے درتے جاواں
جتھے ہووے دو عَالم دا گزارا
شاعر کا نام :- محمد اعظم چشتی
کتاب کا نام :- کلیاتِ اعظم چشتی