جس ویلے پاک محمد دا لب اتے نام آجاندا اے
دُکھ درد غماں دے مارے نوں سکھ چین آرام آجاندا اے
ہُندے نے جیہڑی محفل وچ ، اذکار محمد عربی دے
اُس محفل پاک مقدس نوں ، اللہ دا سلام آجاندا اے
ملدا اے سرور ہواواں نوں ، آجاندا کیف فضاواں نوں
جد طیبہ والے ساقی دا ، گردش وچ جام آجاندا اے
انج لگدا سی اُلٹ جہان گیا ، یاں رحل توں ڈرگ قرآن پیا
کھا برچھی تھلے گھوڑے توں ، جد پاک امام آجاندا اے
اوہدی شان بشر نے کی کہنی ، کی صفت فرشتیاں کر لینی
جہدی شان مقدس وچ سارا ، اللہ دا کلام آجاندا اے
اقصیٰ وچ نور نظارے سی ، راہ تکدے مُرسل سارے سی
صفاں سدھیاں نبیاں کر لئیاں ، جد پاک امام آجاندا اے
بن شیر وی بکری جاندے نے ، ہو حاضر سیس نواندے نے
جدوں صائم سامنے سوہنے دا ، خادم تے غلام آجاندا ہے
شاعر کا نام :- علامہ صائم چشتی
کتاب کا نام :- کلیات صائم چشتی