جو دیکھنے میں بڑے دیدہ ور نظر آئے
ترے حضور سبھی بے ہُنر نظر آئے
خلاؤں سے کہیں آگے مِلا مقامِ بشر
فرازِ عرش تری رہگذر نظر آئے
وہ آئینہ ہے ترا حُسنِ آئینہ تمثال
جس آئینے میں خود آئینہ گر نظر آئے
تجلّیوں میں نہائی ہُوئی سحر کی طرح
ترے دیار کے دیوار و در نظر آئے
محیط ہے کئی صدیوں پہ اک وہ لمحۂ دید
جو مختصر سے بھی کچھ مختصر نظر آئے
تُو مِل گیا تو یہ خواہش بھی مٹ گئی دل سے
کہ خوب سے بھی کوئی خوب تر نظر آئے
کس آفتاب صِفّت حُسن کا دیار ہے یہ
کہ ذرّہ ذرّہ جہاں خود نگر نظر آئے
زبانِ نعت کو مِل جائے گر نوائے غزل
تو جُوئے آب میں موجِ شرر نظر آئے
دبی ہوئی ہے کوئی آگ گوشۂ دل میں
ردائے شب میں فروغِ سحر نظر آئے
جبینِ عشق ادب آموز ہے ابھی ، ورنہ
قدم قدم پہ ترا سنگِ در نظر آئے
مرا کریم بھی کیسا کریم ہے اعظؔم
کہ میرا عیب بھی جس کو ہنر نظر آئے
شاعر کا نام :- محمد اعظم چشتی
کتاب کا نام :- کلیاتِ اعظم چشتی