کبھی نہ چھوڑے ہے تنہا خیالِ یار مجھے

کبھی نہ چھوڑے ہے تنہا خیالِ یار مجھے

خیال یار نے بخشا بڑا قرار مجھے

---

میں یورشِ غم دنیا سے مر گیا ہوتا

تیرے کرم نے سنبھالا ہے بار بار مجھے

---

کبھی جو مست نگاہوں سے تو نے دیکھا تھا

چڑھا ہوا ہے ابھی تک وہی خمار مجھے

---

تیرے قدم کی میں نسبت سے سرفراز ہوا

تیرے ہی صدقے ملی عزت و وقار مجھے

---

ہیں اور دولتِ دنیا پر ناز ہے جن کو

ترا کرم ہے فقط وجہ افتخار مجھے

---

وہ شخص دیکھ کے دل جس کو مسکراتا تھا

چلا گیا ہے کہاں کر کے سوگوار مجھے

---

میں اس کی راہ میں آنکھیں بچھائے بیٹھا ہوں

جو دے گیا ہے ہمیشہ کا انتظار مجھے

---

کبھی تو وجہ سکون بن گئیں تری یادیں

کبھی کیا تری یادوں نے بے قرار مجھے

---

یہ ہے غلامی آل بتول کا صدقہ

بڑے تپاک سے ملتے ہیں تاجدار مجھے

---

ان آنسوؤں کو نیازی میں کس طرح روکوں

دل حزیں پہ نہیں کچھ بھی اختیار مجھے