کالی کملی ہے اُس دی نورانی تے چن مُکھ مدنی دا
مَا زَاغ ہے اکھ مستانی تے چن مکھ مدنی دا
اُسدے نوروں روشن تارے عالم سارے
اُسدے رُخ دے ہین نظارے سب چمکارے
اوہ ہے ٹُٹیاں دِلاں دا جانی تے چن مکھ مدنی دا
اُس نے رب توں سب کُجھ پایا ، عالی پایا
اُس دا پایا کسے ناں پایا ، رب فرمایا
اوہدی دو جگ تے سُلطانی تے چن مکھ مدنی دا
اُس دی سب توں شان دو بالا ، ارفع اعلیٰ
اُس دا جگ وچ نور اُجالا ، رحمت والا
اوہدی سب خلقت دیوانی ، تے چن مکھ مدنی دا
کسے دے تائیں نظر نہ آیا ، اُس دا سایا
بے سایا دا سب تے سایا ، رب دا سایا
لیسین اوہدی پیشانی تے چن مکھ مدنی دا
صائم ہے اوسے دا ہونا ، سب دا ہونا
سوہنا ہر سوہنے توں سوہنا ، سوہنا ای سوہنا
اوہدا نُور ہے نُورِ حقانی تے چن مُکھ مدنی دا
شاعر کا نام :- علامہ صائم چشتی
کتاب کا نام :- کلیات صائم چشتی