کوثر کی حلاوت ہے مری تشنہ لبی میں

کوثر کی حلاوت ہے مری تشنہ لبی میں

مصروف ہوں میں مدحِ رسُولِؐ عربی میں

---

تنہائی میں دمساز ہے اُس مہ کا تصوّر

کیوں موجِ ضیا ہو نہ مری تیرہ شبی میں

---

ہے حُسن بھی ، اخلاق بھی ، رحمت بھی ، کرم بھی

مکّی ، مَدنی ، ہاشمی و مطّلبی میں

---

ہر حُسن کا محور ہے وہ اک ذاتِ مقدّس

ہر علم کا جوہر ہے اُس اُمّی لقبی میں

---

ہر ذرّہ نظر آتا ہے خورشید بداماں

جلوے ہیں کئی طُور نما کوئے نبیؐ میں

---

کِس آنکھ نے دیکھا ہے کوئی آپؐ کا ہمسر

کس کو ہے کلام آپ کی عالی نسبی میں

---

اے چشم کَرم ، تیری مسیحائی کے قرباں

ہے کوئی کمی میری ہی درماں طلبی میں

---

اعظؔم بڑی نعمت ہے یہ رونا ، یہ تڑپنا

شامل ہے مرا درد سکونِ قلبی میں