خُون پانی ہو، یہ انداز مگر، پیدا کر

خُون پانی ہو، یہ انداز مگر، پیدا کر

صدفِ دل میں طرح دار گُہَر پیدا کر

---

شوقِ دیدار میں کچھ حُسنِ اثر پیدا کر

خود سِمٹ آئے تجلّی ، وہ نظر پیدا کر

---

مانگ کر مہرِ رسالتؐ سے ضیا کی خیرات

اپنے ظلمت کدۂ دل میں سحر پیدا کر

---

بے خودی، عشق، وفا سوزِ طلب، ذوقِ نیاز

راہِ طیبہ کے لیے زادِ سفر پیدا کر

---

دُور، نزدیک کوئی چیز نہیں اُن کے لیے

اک ذرا اپنی صداؤں میں اثر پیدا کر

---

ہجرِ آقاؐ میں بہیں اشک، مگر حد میں رہیں

کچھ نہ کچھ ضبط بھی اے دیدۂ تر! پیدا کر

---

کہہ رہی ہے یہ مسلماں سے محمدؐ کی نماز

جَبہہ سائی کے جو لائق ہو، وہ سَر پیدا کر

---

کہتے ہیں، ٹوٹے ہُوئے دل میں خدا رہتا ہے

تُو بھی اِس کعبے کی دیوار میں در پیدا کر

---

اُن کا جلوہ تو ہر اک شے سے ہے ظاہر باہر

آنکھ اللہ نے دی ہے، تو نظر پیدا کر

---

پُرسشِ حال کو تشریف وہ لائیں گے ضرور

سوزِ دل، ذوقِ وفا، دردِ جگر پیدا کر

---

دیکھ اللہ کا گھر شوق سے پھر جا کے نصیرؔ

پہلے دل میں کسی انسان کے گھر پیدا کر