کسی سکندر سے کم نہیں ہیں کہ ہم گدا ہیں در نبی کے
بڑے مزے سے گذر رہی ہے بڑے کرم ہیں مرے سخی کے
کسی کا در دیکھتے نہیں ہیں کسی سے بھی مانگتے نہیں ہیں
بڑے غنی ہیں بڑے سخی ہیں فقیر آقا تری گلی کے
نہ حال دل غیر سے کہیں گے تمہارے در پر پڑے رہیں گے
تری گلی کے ہیں ہم بھکاری اُٹھائیں احسان کیوں کسی کے
جو مرے اپنے نصیب ہارے ترے کرم نے دیئے سہارے
ترے کرم کے نثار جاؤں رہے نہ احساس تک کمی کے
خدا کرے تم حرم میں پہنچو کرم سے باب کرم میں پہنچو
قسم خدا کی ہے میرا دعوی سرور آئیں گے بندگی کے
نظر میں جلوے ہوں جالیوں کے لبوں پہ نعتوں کے ہوں ترانے
خُدا کرے کہ طویل تر ہوں زمانے میری وہ حاضری کے
مزے جو لوٹے مدینے جا کے بیاں نیازی کروں وہ کیسے
بڑے نرالے بڑے حسیں تھے وہ چار دن میری زندگی کے
شاعر کا نام :- عبدالستار نیازی
کتاب کا نام :- کلیات نیازی