کوئی عالم نہ کوئی صاحبِ عرفاں نِکلا

کوئی عالم نہ کوئی صاحبِ عرفاں نِکلا

ایک اُمّی ہی مگر صاحبِ قُرآں نِکلا

---

شاہِ افلاک ترے ذِکرِ مقدس کے بغیر

نا مُکمّل مرا افسانۂ اِیماں نِکلا

---

ہر نبی محرمِ اسرارِ الٰہی تھا مگر

کوئی تجھ سا نہ خود آگاہ و خداداں نِکلا

---

خُلد اور اِس قدر آسُودگی ، اللہ اللہ

سایۂ خُلد ترا سَایۂ داماں نِکلا

---

رُک گیا تھا جو کبھی آنکھ سے گِرتے گِرتے

آج وہ اشک علاجِ غمِ عصیاں نِکلا

---

یُوں تو ہر صنفِ سخن سے ہوں شناسا لیکن

ذکرِ احمدؐ ہی مری زیست کا ساماں نکلا

---

یہ جہاں اَور ہے ‘ وہ اَور جہاں ہے اعظؔم

جِس جہاں سے وہ مرا مہرِ درخشاں نِکلا