لعل و گوہر نہ دمکتا سا نگینہ مانگے
دِل بیتاب فقط خاکِ مدینہ مانگے
میں جہاں جائوں تِری یاد مِرے ساتھ رہے
زندگی ایسے تعلق کا قرینہ مانگے
میں ٹھہر جائوں تِرے دَر پہ سوالی بن کر
زندگی میری کوئی ایسا مہینہ مانگے
ایسے انسان کی چاہت پہ فرشتے نازاں
تجھ کو مانگے جو تِرا درد خزینہ مانگے
غم کی موجوں سے بچا کر مجھے رکھنا مولاؐ!
میری ہر ایک دُعا تیراؐ سفینہ مانگے
باغِ فردوس کے ہر گُل کی ہے خواہش فیضیؔ
اپنی خوشبو کے لئے اُنؐ کا پسینہ مانگے
شاعر کا نام :- اسلم فیضی
کتاب کا نام :- سحابِ رحمت