زہے نصیب اُنہیںؐ ربط حالِ زار سے ہے

زہے نصیب اُنہیںؐ ربط حالِ زار سے ہے

مری مراد مدینے کے تاجدار سے ہے

---

محیطِ جاں ہے وہی مرکزِ جہاں ہے وہی

قرار قلب کو جِس نقطۂ قرار سے ہے

---

کلامِ حق سے ہے ظاہر حبیبِ حق ہیں وہی

جہاں بھی ذِکر ہے اُنؐ کا بڑے ہی پیار سے ہے

---

مری نجات کا اعمال پر مدار نہیں

یہ آسرا مُجھے محبُوبِ کِردگار سے ہے

---

اُنہیںؐ سے ہو گا شفاعت کا مرحلہ آساں

وہیؐ تو ہیں جنہیں شفقت گناہ گار سے ہے

---

اگر ہے اُنؐ سے محبّت تو حکم بھی مانو

اُمید اُنؐ کو یہ اپنے امیدوار سے ہے

---

بیادِ ذاتِ گرامی بہ فیضِ قلبِ گداز

سکُون دِل کو بہت چشمِ اشکبار سے ہے

---

مُجھے شعُور نہیں آپؐ کے مناقب کا

حضورؐ میری یہ مدحت مرے شمار سے ہے