میں بُوہے پلکاں دے اک پل نہ ڈھوواں یا رسول اللہ
تساڈی یاد وچہ تڑفاں تے روواں یارسول اللہ
زمانہ ہر قدم تے ڈیگ دا مینوں رہوے آقا
کرم تیرے تھیں مڑ مڑ میں کھلوواں یارسول اللہ
چراغاں کر لواں میں دل دیاں تاریک راتاں وچ
نساڈے غم دیاں لے لے کے لوواں یارسول اللہ
میرے کچے نے اتھرو کچ دے موتی جیویں ہُندے
کیویں میں ہار ایہناں دے پروواں یارسول اللہ
بس ایہو آرزو میری تے ایہو التجا میری
تیرے دربار تے حاضر میں ہوواں یارسول اللہ
میرے عملاں دا دفتر کالیاں راتاں توں کالا اے
کویں ہنجواں دے پانی نال دھوواں یارسول اللہ
تڑف کے اتھرو اکھیاں چوں صائم باہر آجاندے
بتھیرا میں تے درداں نوں لکوواں یا رسول اللہ
شاعر کا نام :- علامہ صائم چشتی
کتاب کا نام :- کلیات صائم چشتی