مزاجِ زندگی ہے سخت برہم سیّدِؐ عالم
دگر گوں ہیں بہت احوالِ عالم سیّدِؐ عالم
نرالے دردوغم سے ہے دوچار اس عہد کا انساں
نہیں چارہ کوئی جن کا فراہم سیّدِؐعالم
اسیرِ حادثاتِ نَو بَنو ہے اُمّتِ آخر
کہ اس پر یورشِ اعدا ہے پہیم سیّدِؐعالم
عنایت کا ہے جویا ہر دلِ افسردہ و محزوں
طلب گارِ کرم ہر چشمِ پُرنم سیّدِؐعالم
مداوا سب دُکھوں کا ہے دعا تری شہِؐ والا
نظر تیری ہے سب زخموں کا مرہم سیّدِؐعالم
تری عظمت زمانے میں مسلّم سیّدِؐعالم
موخّر ہو کے بھی تو ہے مقّدم سیّدِؐعالم
تری تعلیم نے انساں پہ کھو لے راز ہستی کے
تری ممنون ہے اولادِ آدم سیّدِؐعالم
کہاں فکرِ زبوں میرا ، کہاں اوج و شرف تیرا
اڑا عرشِ بریں پر تیرا پرچم سیّدِؐعالم
چمن زارِ تمنّا جس سے رہتا ہے تروتازہ،
وہ ہے تیری حسیں یادوں کی شبنم سیّدِؐعالم
شاعر کا نام :- حفیظ تائب
کتاب کا نام :- کلیاتِ حفیظ تائب