مصطفیؐ و مجتبیٰؐ میرے حضورؐ
شافعِ روزِ جزا میرے حضورؐ
بے ریا و بے خطا میرے حضورؐ
پیکرِ صدق و صفا میرے حضورؐ
بخش دیں اپنی رضا میرے حضورؐ
ہے یہی اِک التجا میرے حضورؐ
خالقِ کُل بھی پڑھے تُجھ پر درُود
ہو حبیبِ کبریا میرے حضورؐ
آپؐ ہیں لا ریب ختم المرسلیں
تاجدارِ انبیاء میرے حضورؐ
آپ ؐ کے منگتوں میں ہیں شاہ و گدا
منبعِ جُود و سخا میرے حضورؐ
سوختہ جانوں کو ہریالی ملے
برسے رحمت کی گھٹا میرے حضورؐ
آپؐ کا دَر چھوڑ کر جائیں کہاں
ہر دُکھی کا آسرا میرے حضورؐ
گر نہ ہوتے آپؐ تو کچھ بھی نہ تھا
باعثِ ارض و سما میرے حضورؐ
آپؐ کے دم سے ہے سارا ارتقاء
آدمیت کی بقا میرے حضورؐ
نازشِ عرش بریں بھی آپؐ ہیں
رونقِ ہر دوسرا میرے حضورؐ
جب پڑھا صَلّ عَلیٰ غم مٹ گئے
درد مندوں کی دوا میرے حضورؐ
سج گئی یہ کائناتِ رنگ و بُو
جب ہوئے جلوہ نما میرے حضورؐ
شاعر کا نام :- اسلم فیضی
کتاب کا نام :- سحابِ رحمت