اوہدے بخت دی کیہڑا ریس کرے جہنوں حاضری دا پیغام آوے
اوس شام توں واراں لکھ شاماں جیہڑی پاک مدینے شام آوے
جہناں دے درداں دا دارو دیدار ہے روضہ انور دا
بن ویکھیاں روضہ سوہنے دا کیویں اوہناں نوں آرام آوے
اوتھے بن دے حاکم جہاناں دے اوتھے جھکدے سر سلطاناں دے
اس در دیاں شاناں کی دساں جتھے بن جبریل غلام آوے
اے پاک مدینے دے راہی ایہہ شرط ادب دی یاد رہوے
لب سیتے اتھرو وگدے ہوون جس ویلے خاص مقام آوے
رہندا اے کوئی عرشاں تے بھاویں وسدا کوئی فرشاں تے
جدوں آوے سوہنے دے در تے اوہ پڑھدا درود سلام آوے
محبوب دے روضے تے جاکے ہوے اینی ہوش نیازی نوں
سوہنے دے ذکر کلام بناں نہ لب تے ہور کلام آوے
شاعر کا نام :- عبدالستار نیازی
کتاب کا نام :- کلیات نیازی