روضے دی جالی دِسدی اے یاں گنبد خضرا وِسدا اے
اسیں جِدھر نظراں چکنے آں بس شہر مدینہ دِسدا اے
ہُن ہور نہ توں ترسا سانوں ہُن چھیتی کول بُلا سانوں
بِن ویکھے تیریاں گلیاں نوں ہُن مُشکل جینا دِس دا اے
اساں جد دی ہوش سنبھالی اے، اک درتے نظراں جمیاں نیں
دو جگ وِچ اساں غریباں نوں اِکّوای سہارا دِسدا اے
جَد جا ؤاُس دروازے تے مُنہ منگیاں مراداں مِلدیاں نیں
جَد ویکھو جوشاں وِچ اوہدی رحمت دا دریا دِسدا اے
مینوں تے تائب بخشش دا کوئی پاک نبی ؐ دے نام بِناں
نہ ہور وسیلہ سُجھدا اے ، نہ ہور ذریعہ دِسدا اے
شاعر کا نام :- حفیظ تائب
کتاب کا نام :- کلیاتِ حفیظ تائب