گلاں سچیاں میں آکھ سناواں
کوئی تیرے جیہا ایک وی نئیں
تیرے گیت حضور میں گاواں
کوئی تیرے جیہا اک وی نئیں
اکھ مستانی جسم نورانی
کوئی نہ سوہنیا تیرا ثانی
تیرا ویکھیا نہ کسے پرچھاواں
کوئی تیرے جیہا اک وی نئیں
توں سوہنا تے سوہنا رج کے
عیباں نوں رکھنا ایں کج کے
چارے پاسیوں ایہہ اوندیاں صداواں
کوئی تیرے جیہا اک وی نئیں
حسن تیرے جگ موہ لیا سارا
محبوبا مدنی من ٹھارا
تیرے نال میں کیہنوں ملاواں
کوئی تیرے جیہا اک وی نئیں
تیری مثل مثال نہ کوئی
تیرے جیہا لج پال نہ کوئی
تیری کی کی میں صفت سناواں
کوئی تیرے جیہا اک وہی نئیں
الفوں بے نہ جانے نیازی
ہو گئی تیری کرم نوازی
تیرے ناں توں میں واری واری جاواں
کوئی تیرے جیہا اک وی نئیں
شاعر کا نام :- عبدالستار نیازی
کتاب کا نام :- کلیات نیازی