ساہ آیا آیا ناں آیا اِس ساہ دا کچھ اعتبار نہیں
دم دم تیرے دم گھٹ دے نے اس دم بدلے دم مار نہیں
ایتھے اپنے اپنے نہیں بن دے کی شکوہ کرئیے غیراں دا
ایہنوں سمجھ نہ اپنی ناداناں ایہہ دنیا کسے دی یار نہیں
جہنوں اپنی اپنی کردا ایں جس اُتے جاندا مردا ایں
لکھ پیار توں کر اس دنیا تھیں ایہہ کسے نوں کر دی پیار نہیں
توں گوہڑیاں گوہڑیاں رنگاں تے پیا ایویں مر مر جانا ایں
ایہہ کنڈیاں بھریاں جھاڑیاں نے ایہہ گلشن نہیں گُلزار نہیں
عملاں تھیں جھولی بھردا رہو سوہنے دا ذکر توں کردا رہو
تری منزل راہیا لمی ایں توں راہ وچ پیر پسار نہیں
کربل وچ سبق سکھایا سی اُمت نوں شہید اعظم نے
ایہہ دنیا دھوکھا ای دھوکھا اے ایہہ کسے نوں کردی پیار نہیں
کیوں بھل جاناں ایں ناداناں توں قبر ہنھیری وچ جانا
جتھے باہجوں عشق محمد دے تیرا ہونا بیڑا پار نہیں
جدوں وقت اخیری اوناں ایں سجناں نے مُکھ پرتاؤناں ایں
تیرے مُک گئے ساہ تے اک ساہ وی تینوں دینا کسے اُدھار نہیں
محشر نوں پیش جاں ہوویں گا تک تک عملاں نوں روویں گا
تیرے ہتھاں پیراں وی صائم بنناں تیرا غمخوار نہیں
شاعر کا نام :- علامہ صائم چشتی
کتاب کا نام :- کلیات صائم چشتی