ساڈی مدنی دے ہتھ ڈور ، ساڈی مدنی دے ہتھ ڈور
اَسی تے کی آں نبیاں وچ وی ، اُس دی مثل ناں ہور
اُس دی بزم سجاندا جاویں
جھنڈے جھنڈیاں لاندا جاویں
قسم خدا دی ہو جاوے گی ، روشن تیری گور
شرک جو پاک میلاد نوں کہندے
طعنے دین جو اُٹھدے بہندے
ایہہ نے دین دے پکے ڈاکو ایہہ ایمان دے چور
اپنا آپ ناں ویکھن چاکن
اوہنوں اپنے ورگا آکھن
جو اُنگلاں چوں چشمے کڈھے رکھ لیندا جو تور
دکھ دنیا دے ٹالن والا
خلقت رب دی پالن والا
کمزوراں نوں اُس دے درتوں ، مل جاندا اے زور
گلاں اوہدیاں لہندے چڑھدے
دو جگ اوہدیاں نعتاں پڑھدے
دھرتی تے آسماناں وچ اے صلِ علٰی دا شور
جو نہیں منگتا اوس نبی دا
جو بے ادب ہے شہر نبی دا
اوہنوں اللہ پاک ہے دیندا لون دے وانگوں کھور
دبین چ صائم تنگی نہیں سی
اک وی گل بے رنگی نہیں سی
نبی دے پاک میلاد دے منکر ، دین نوں رہے نے بھور
شاعر کا نام :- علامہ صائم چشتی
کتاب کا نام :- کلیات صائم چشتی