سارے سوہنیاں تو سوہنا بن آیا اوہدی کیہڑا ریس کرے
جِنہوں پُچھ پُچھ رَب نے بنایا اوہدی کیہڑا ریس کرے
پھُل اہدے لباں کولوں خَیراں بیٹھے منگدے
رات دے ہنھیرے اوہدی زلفاں تو ں سنگدے
جِنہوں ریجھاں نال رب نے سجایا اوہدی کیہڑا ریس کرے
سارے سوہنیاں تو ں سوہنا بن آیا اوہدی کیہڑا ریس کرے
ہر اِک شاہ اوہدا سجنوں غلام ایں
ہر اِک سوہنا اوہنوں کردا سلام ایں
جہدے اَگے سِر سب نے جھُکایا اوہدی کیہڑا ریس کرے
سارے سوہنیاں توں سوہنا بن آیا اوہدی کیہڑا ریس کرے
ڈُبّے ہوئے شمس وی پچھاں مڑ پیندے نے
اوہدیاں اشاریاں رُکھ ٹُر پیندے نے
جِنہے پتّھراں نوں کلمہ پڑھایا اوہدی کیہڑا ریس کرے
سارے سوہنیاں توں سوہنا بن آیا اوہدی کیہڑا ریس کرے
حاکم اَساں دیناں ایس جُملے نُوں طُول نئیں
اوہدے جیہا ہور کوئی رَب نُوں قبُول نئیں
ایسے گلے اوہدا بنیاں ناں سایا اوہدی کیہڑا ریس کرے
سارے سوہنیاں توں سوہنا بن آیا اوہدی کیہڑا ریس کرے
شاعر کا نام :- احمد علی حاکم
کتاب کا نام :- کلامِ حاکم